នៅព្រឹកថ្ងៃអង្គារ ៧រោច ខែភទ្របទ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៤ ខែកញ្ញា ឆ្នាំ២០២៤ វេលាម៉ោង ០៨:៣០ នាទីព្រឹក នៅទីតាំងសួនច្បារខាងលិចវិមានឯករាជ្យ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត បានយាងជាព្រះរាជាធិបតីភាពដ៏ខ្ពង់ខ្ពស់បំផុត ក្នុងព្រះរាជពិធីសម្ភោធវិមានរដ្ឋធម្មនុញ្ញ ដោយមានការយាង និង អញ្ជើញចូលរួមពីសម្តេចអគ្គមហាសេនាបតីតេជោប្រធានក្រុមឧត្តមប្រឹក្សាផ្ទាល់ព្រះមហាក្សត្រ និជាប្រធានព្រឹទ្ធសភានៃព្រះរាជាណាចក្រកម្ពុជា សម្តេចមហាបវរធិបតីនាយករដ្ឋមន្ត្រី សម្តេច ទ្រង់ ឯកឧត្តម លោកជំទាវ សមាជិក សមាជិកា ព្រឹទ្ធសភា រដ្ឋសភា រាជរដ្ឋាភិបាល ក្រុមប្រឹក្សាធម្មនុញ្ញ ឯកឧត្តម លោកជំទាវ ឯកអគ្គរាជទូត ឯកអគ្គរដ្ឋទូត ភ្ញៀវកិត្តិយសជាតិនិងអន្តរជាតិ យ៉ាងច្រើនកុះករ។ ឯកឧត្តមកិត្តិនីតិកោសលបណ្ឌិត អុឹម ឈុនលឹម ប្រធានក្រុមប្រឹក្សាធម្មនុញ្ញនៃព្រះរាជាណាចក្រកម្ពុជា បានអញ្ជើញថ្លែងសុន្ទរកថាថ្វាយព្រះមហាក្សត្រ និង អង្គព្រះរាជពិធី (ខ្លឹមសារលម្អិតមានក្នុងសុន្ទរកថារបស់ឯកឧត្តមកិត្តិនីតិកោសលបណ្ឌិតប្រធានក្រុមប្រឹក្សាធម្មនុញ្ញ)។ បន្ទាប់ពីឯកឧត្តមកិត្តិនីតិកោសលបណ្ឌិតប្រធានក្រុមប្រឹក្សាធម្មនុញ្ញ ថ្លែងសុន្ទរកថារួចហើយ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ស្តេចយាងប្រទានព្រះរាជសុន្ទរកថាជូនអង្គព្រះរាជពិធី (ព្រះរាជខ្លឹមសារលម្អិតមានក្នុងព្រះរាជសុន្ទរកថាព្រះមហាក្សត្រ) ។ បន្ទាប់មកស្តេចយាងកាត់ខ្សែបូសម្ពោធវិមានរដ្ឋធម្មនុញ្ញ និងស្តេចយាងទតវិមានរដ្ឋធម្មនុញ្ញ មុននឹងស្តេចយាងនិវត្តន៍ទៅព្រះបរមរាជវាំងវិញ ៕
24 កញ្ញា 2024