នៅព្រឹកថ្ងៃព្រហស្បតិ៍ ១៥រោច ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០៦ ខែមិថុនា ឆ្នាំ២០២៤ នៅសាលសន្និសីទក្រុមប្រឹក្សាធម្មនុញ្ញ អគារ ស វិមានរដ្ឋចំការមន តបតាមការស្នើសុំពីសាកលវិទ្យាល័យកម្ពុជា (University of Cambodia) ឯកឧត្តមកិត្តិនីតិកោសលបណ្ឌិត អុឹម ឈុនលឹម ប្រធានក្រុមប្រឹក្សាធម្មនុញ្ញ ចាត់ឯកឧត្តម តាំង រតនា អគ្គលេខាធិការនៃក្រុមប្រឹក្សាធម្មនុញ្ញ និងសហការី ទទួលជួបនិស្សិតមហាវិទ្យាល័យច្បាប់នៃសាកលវិទ្យាល័យកម្ពុជា ចំនួន ៦៥រូប ដឹកនាំដោយលោកស្រីសាស្ត្រាចារ្យ ព្រំម កល្យាណ អញ្ជើញមកធ្វើទស្សនកិច្ចសិក្សាស្វែងយល់អំពី «ការពិនិត្យធម្មនុញ្ញភាពនៃច្បាប់ និង ការដោះស្រាយបណ្តឹងក្រោយការបោះឆ្នោតជាសកលជ្រើសតាំងតំណាងរាស្ត្រ»។ គោរពតាមការចាត់តាំងនេះ ឯកឧត្តម តាំង រតនា បានធ្វើបទបង្ហាញជូនដល់ប្រតិភូនិស្សិតអំពីការពិនិត្យធម្មនុញ្ញភាពនៃច្បាប់ និង ឯកឧត្តម ស៊ាន សូលីវុធ អគ្គនាយកសេវាច្បាប់និងបច្ចេកទេស ធ្វើបទបង្ហាញអំពីការដោះស្រាយបណ្តឹងក្រោយការបោះឆ្នោតជាសកលជ្រើសតាំងតំណាងរាស្ត្រ។ ក្នុងឱកាសនោះ លោកស្រីសាស្ត្រាចារ្យ ព្រំម កល្យាណ និងតំណាងប្រតិភូនិស្សិត បានគោរពថ្លែងអំណរគុណដ៏ជ្រាលជ្រៅជូនឯកឧត្តមកិត្តិនីតិកោសលបណ្ឌិត អុឹម ឈុនលឹម ប្រធានក្រុមប្រឹក្សាធម្មនុញ្ញ ដែលបានអនុញ្ញាតឱ្យប្រតិភូនិស្សិតនៃសាកលវិទ្យាល័យកម្ពុជា បានមកស្តាប់បទបង្ហាញពីវាគ្មិន ទស្សនាសាលសវនាការ និងទទួលបានចំណេះដឹងល្អៗពីក្រុមប្រឹក្សាធម្មនុញ្ញ។
07 មិថុនា 2024