នៅព្រឹកថ្ងៃអង្គារ ២កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២១ ខែកុម្ភៈ ឆ្នាំ២០២៣ ឯកឧត្តមបណ្ឌិត ព្រហ្ម វិចិត្រអក្ខរា អគ្គលេខាធិការរងនៃក្រុមប្រឹក្សាធម្មនុញ្ញ បានដឹកនាំក្រុមការងារចំពោះកិច្ចនៃអគ្គលេខាធិការដ្ឋានក្រុមប្រឹក្សាធម្មនុញ្ញ រួមជាមួយនឹងក្រុមការងារបច្ចេកទេសចំពោះកិច្ចនៃក្រសួងអប់រំ យុវជន និង កីឡា ដឹកនាំដោយបណ្ឌិត ម៉ុក សារ៉ុម អគ្គនាយករងអប់រំ បានធ្វើទស្សនកិច្ចសិក្សានិងសំណេះសំណាលជាមួយលោកគ្រូ អ្នកគ្រូ សិស្សានុសិស្សនៃសាលាបឋមសិក្សាវត្តបូព៌ ស្ថិតនៅក្នុងក្រុងសៀមរាប ខេត្តសៀមរាប ដែលជាសាលាបឋមសិក្សាគំរូ និងជាសាលាផ្តល់សេវាសាធារណៈល្អ ជាប់ចំណាត់ថ្នាក់លេខ១ទូទាំងប្រទេស ។ ការធ្វើទស្សនកិច្ចនេះក្នុងគោលបំណងសិក្សាស្វែងយល់ពីការបណ្តុះបណ្តាលនិងការរៀបចំកម្មវិធីសិក្សានៅក្នុងសាលានេះ សម្រាប់ប្រើប្រាស់ជាធាតុចូលក្នុងការរៀបចំសៀវភៅជំនួយស្មារតីរួមសម្រាប់គាំទ្រដល់ការដាក់បញ្ចូលបទប្បញ្ញត្តិគ្រឹះមួយចំនួននៃរដ្ឋធម្មនុញ្ញទៅក្នុងកម្មវិធីសិក្សាកម្រិតបឋមសិក្សា កម្រិតមធ្យមសិក្សាបឋមភូមិ និងកម្រិតមធ្យមសិក្សាទុតិយភូមិ ស្របតាមស្មារតីនៃអនុស្សរណៈនៃការព្រមព្រៀងរវាងក្រុមប្រឹក្សាធម្មនុញ្ញនិងក្រសួងអប់រំ យុវជន និងកីឡា ដែលទាំងនេះគឺជាគំនិតផ្តួចផ្តើមរបស់ឯកឧត្តមកិត្តិនីតិកោសលបណ្ឌិតប្រធានក្រុមប្រឹក្សាធម្មនុញ្ញ។ នាឱកាសនោះផងដែរ ឯកឧត្តមបណ្ឌិត ព្រហ្ម វិចិត្រអក្ខរា បានផ្តាំផ្ញើការសួរសុខទុក្ខពីសំណាក់ឯកឧត្តមកិត្តិនីតិកោសលបណ្ឌិតប្រធានក្រុមប្រឹក្សាធម្មនុញ្ញ ដល់គណៈគ្រប់គ្រងវិទ្យាល័យ លោកគ្រូ អ្នកគ្រូ សិស្សានុសិស្សទាំងអស់ និងបាននាំយកថវិកាចំនួន ១លានរៀល ដែលជាថវិកាផ្ទាល់របស់ឯកឧត្តមកិត្តិនីតិកោសលបណ្ឌិតប្រធានក្រុមប្រឹក្សាធម្មនុញ្ញ ឧបត្ថម្ភដល់សាលាបឋមសិក្សាវត្តបូព៌ ដើម្បីជាការរួមចំណែកជួយសាលាប្រើប្រាស់ជាប្រយោជន៍រួមដល់សិស្សានុសិស្សទាំងអស់ និង ក្រុមសិល្បតន្ត្រីដែលសម្តែងជូនគណៈប្រតិភូ ក្នុងម្នាក់ៗចំនួន៥ពាន់រៀល ។
21 កុម្ភៈ 2023